他從沒想過靠一封電郵，能找回日夜記掛的手足。四十年代，家中排行第四的潘伯與年僅五歲的弟弟逃難到內地，走私商販將兄弟倆賣到農村做苦工，其後兩人經歷千辛萬苦，翻山過嶺逃回香港，感情特別深厚。
香港光復後，十七歲的潘伯到工廠打工，弟弟則到茶樓賣點心。兩兄弟為口奔波，聚少離多，結果失去聯絡，自此兩兄弟便失散超過半個世紀。
一封電郵 重逢契機
潘伯一直耿耿於懷，即使生活艱難、工作忙碌，他也從未淡忘尋找弟弟的事。「年紀漸大，希望找回弟弟，曾在報紙登尋人啟事，但是徒勞無功。」轉眼數十年過去，潘伯在大學教授介紹下，認識了教導長者學習電腦的網站，學會了寫網誌，他以「大蕃薯」的網名跟網友分享童年回憶。「每寫一篇網誌便哭一次。
我著實很掛念弟弟，網友都很同情我，經常給我留言鼓勵。」後來有網友介紹他查詢由公益金資助的尋人服務，一封電郵查詢，鋪設了兄弟相認的橋樑。
一聲「四哥」確認眼前人
個多月後，工作人員聯絡潘伯，說已找到他的弟弟並安排他們兩兄弟重聚。相認一刻，一聲「四哥」讓潘伯確定眼前人就是失散了逾半世紀的弟弟─潘華。弟弟還帶了妻子、媳婦等前來見面，兩兄弟都眼泛淚光，場面感人。「還記得與弟弟重聚的一刻，我內心十分激動，如沒有紅十字會及公益金的協助，恐怕在我們有生之年，也不能一家團聚，願望成真！」弟弟也坦言記掛潘伯，透露曾在電視上看過哥哥的身影，但因不太肯定而作罷，難得重逢，兩人悲喜交集。弟弟一句，「哥哥，您真的已經老了。」更讓潘伯老淚縱橫。
第二次見面，潘森到弟弟家中作客，才得知弟弟病重。服藥後不適的弟弟，請哥哥先回家，下次再相約見面，沒料到當日已是最後一次相聚。
雖然兩兄弟只重逢了二十八天，但潘伯能在於短時間內找到弟弟，好讓他們趕及相聚，彷彿已是一種福份。
潘伯希望跟家人失散的人要堅持信念：「只要你還掛念你的親人，便不要放棄，有心人一定會幫忙。」
由公益金資助的尋人服務協助受天災、戰禍、人為災害或其他特殊原因影響的本港居民尋找失散的親人，令他們家庭團聚。
潘伯生前在yahoo寫的blog，筆名~大蕃薯。
翻開舊檔案时，發现我保留了一部份潘伯的blog文:
回憶,童年時,
(一)
網誌日期：2008-05-25 22:40
我五歲投靠"家叔父"撫養, 兩年後, 父親才逃難來香港, 可以一家團聚, 父親在電車路(皇后酒家)做收銀員, 薪金微薄, 我讀免費學校, (小二班)東華三院義學, 因為家境清貧, 好少同街坊打招呼, 你說姓[羅]的家庭, 問我認識他否?? 我年輕不懂交際, [羅家]應該是"名門望族", 由更館行上幾間鋪, 全是富貴人家, 後面係(儒林台), 都是"醫生.商人"的大宅, 要出入求平安, 許多人們都認識, 一位(馬騮王), 一位(茶居仔), 係太平山街"名氣人物", (後者)係曾經撫養我的"家叔父",
超伯: 我要"飲水思源" 呀!!!
******************************************************************************************
淪陷時期,童年回憶,(二)
網誌日期：2008-06-01 18:28
痛苦可以忍耐, 災難不能忘記, 我是 76歲老人家, 始終忘不了童年往事,
四川地震大災難, 許多"好學生"死亡, 亦有僥倖逃生者, 已經懂事的孤兒,
將來長大成年, 肯定有童年的回憶, 時代改變好多了, 受地震災禍的同胞,
有中國政府關懷支持, 血濃於水, 全民響應捐助物資, 處處有善心人捐款,
(大蕃薯)的童年, 無語問蒼天, 我明白 [天災] 和 [戰禍], 有不同悲哀.傷害,
昨天講到父親無药醫病, 同飢餓及病魔搏鬥, 三個月後就死亡, 炸彈.炮聲,
將三歲細妹, 受驚怕嚇死了, 23歲大哥同 19歲二哥, 知道去"太古船塢"做
苦工, 每日有五蚊軍票, 配給白米一斤, 兩人就冒死報名登記開工, 第一天
返工, 到左午餐之後, 約下午兩點半鐘, (盟軍)飛機有 12架, 開始瘋狂轟炸,
原因要炸毀日本仔船艦, 不幸有數佰名苦工被炸死, 兩位兄長分路狂跑,
二哥在"飯堂厨房"躲避, 大哥跑去西閘 "防空洞", 那麼炸彈就落正洞口,
大哥躲在"防空洞"內, 就在此一刻, 便死在洞裡面, 好慘!! 係監生埋葬呀!!
二哥逃跑時左腳受傷, 頭部燒傷, 頭髮被燒燶, 看到飛機離去, 往西閘跑去,
想同大哥會合, 看見"防空洞"已被炸毀, 大哥可能死亡, 恐怕飛機會再來,
馬上跑離"太古船塢", 去到北角英皇道, 有踩單車的好心人, 睇見二哥受傷,
免費接送返回上環東街, 代表二哥感謝呢位恩人, 明天再講日本仔的罪惡,
(大蕃薯)說聲............各位晚安!!
*************************************************************************
童年回憶,(三)
網誌日期：2008-06-03 18:30
昨天因為[義工組]要做探訪, 晨早 5 點鐘起床, 我 (移居深圳)要做定早餐,
"老伴" 在 7 點起床, 可以享用, 我 6:30am出門, 交通時間約兩小時, 約定在
九龍灣地鐵站, 8:30am全體準時集合, 由兩位姑娘帶領搭(巴士), 約10:00am,
到達一間由"公屋"改建的, 長者護理住宿院舍, 有 105 位老人家接受照顧,
原來是由教會主辦, 姑娘曾經有介紹, 照例 打招呼.唱歌.派禮物.交談問候,
現在繼續講 [童年回憶], 二哥休息兩天後, 因為左腳受傷, 用布裹札住頭部,
由上環行路去鰂魚涌, 我陪同二哥一起走, 用我個膊頭做扔仗, 跛吓!跛吓!
行左三個鐘頭, 到達"太古船塢"西閘口, 唉!!目睹一具一具屍體, 由"防空洞"
搬出來, 我同二哥哭著大喊.........明哥. 明哥呀!! 行前幾步希望認出"明哥",
工作人員對我們說:上午已經用大貨車運走, 送到(柴灣)一個山脈, 將山泥
碎石推下去, 成為一個(亂葬崗), 和平後經過查探, 知悉係"歌連臣角"附近,
點解日本仔咁惡毒, 一個"太古船塢", 就炸死幾佰苦力工人, 真係咬牙切齒,
日本仔知道接近(亡國), 大量招募年青人, 用一斤白米引誘做苦工, 真可耻,
原來背後有陰謀, 利用中國人做"擋箭牌", 令到(盟軍)不敢落炸彈, 日本仔
就趕快修補船艦, 越怏越好準備(走佬), 誰知炸彈無眼, (盟軍)祗服從軍令,
中國人應該體諒(盟軍)的轟炸, 日本仔 (磯谷介廉)為首, 侵佔香港, 打靶呀!!
明天再講吧, 我好眼瞓喇!! 晚安!!
**************************************************************************
淪陷時期,童年回憶,(四)
網誌日期：2008-06-04 17:13
今日繼續寫網誌..... [童年回憶], 香港被日本佔領, 三年零八個月的苦難, 已有
歷史記載, 我祗想講吓自身的感受, 如有過份激動悲哀, 或錯用語句, 請體諒!!
我家中在半年內, 父親.大哥.三歲細妹, 相繼一一死去, 母親帶住剩下四兄姐弟,
母親說有一位姑媽, 住在九龍白嘉士街, 姑丈在(官涌)開雜貨店, 母親給我地址,
要去向姑媽告訴家事, 姑丈.姑媽聽完我細訴, 立即詢問點解??大嫂唔陪住你來,
我回答二哥(頭.腳)受傷, 母親要照顧二哥傷勢, 母親呌我向姑丈借多少糧食, 因
為兩日無食物落肚, 懇求姑媽.姑丈可憐我們, 可惜失望回家, 我食一碗蝦米粥,
離去時姑媽送給一礶牛奶, 一包花生, 呌母親自己想辦法, 回家後, 實話實說,
母親聽完就哭起來, 我們兄姐弟流著淚, 望住我帶回來的牛奶.花生, 晚安,
明天繼續寫網誌,
****************************************************************************
童年回憶,(五)
網誌日期：2008-06-05 22:27
點解我要夜靜才可寫 Blog網誌?? 電視機關了, "老伴"睡覺了,
今日[長者中心], 係每月開例會, 我代買六包"桑芄茶", 携帶
出去香港, 好貴呀!! 每包 180人民幣, 係收(長者特價), 多謝!!
繼續講 [童年回憶], 當年沒有電話通訊, 無法向親戚 (報哀),
對唔住.....父親, 大哥, 經過悲傷痛哭之後, 全家各自找生活,
母親去做(泥工), 二哥在家休養傷患, 我帶住六歲弟弟, 隨處
遊蕩, 看見地下有(難銅.難銻), 可以攞去"收買鋪"換錢, 買些
食物充飢, 大馬路中央戲院開(賭場), 門口有小賣部, 客人食
剩的(蟹爪,蝦壳), 我都給弟弟充飢, 荷里活道 "源記大牌檔"
我在等待客人食剩的, 立即取來食, 大牌檔主人, (黑鬼源)
好惡咁話 : 細路你想係呢道搵食, 要幫我洗晒呢大盆碗筷,
我唯有聽從命令, 踎低快手洗乾淨, 當時(黑鬼源)微微笑,
我想走喇!! 佢大聲說 :細路咪走, 給我兩件"崧糕,兩只粽",
哈哈!! 原來惡人都有善良者, 明天再續, 晚安,
************************************************************
童年回憶,(六)
網誌日期：2008-06-10 21:59
夜深人靜思己過,
皆因"自卑,執著"感坎坷,
良朋網友支持我,
超伯粉絲常勉勵, 自覺慚愧, 饒恕我!!!
恢復自信, 繼續回憶童年時, 寫Blog網誌,
回想"源記大牌檔"的老板, 賞賜的食物, 帶回家四人共分享,
早上起來, 二哥身體的傷勢, 略有好轉, 二哥對母親說 :希望
再去"太古船塢"做苦工, 目的係領取一斤白米, 可養活全家,
母親立即阻止, 怒罵二哥係唔係想去送死, 我哋餓死好過炸死,
母親去做(泥工), 吩咐我照顧二哥同細佬, 我們不能在家捱餓,
三兄弟一齊出門, 四處找尋食物, 行到上環"十皇殿"果菜欄,
執拾地上的(黃難瓜菜), 帶回家煮食充饑, 總算可以飽肚, 以後
我就每日到果菜批發市場, 執拾可以煮食的瓜菜回家, 三角碼頭
有苦力搬運白米, 看見有人, 用削尖竹筒插入米袋, 偷取白米,
沿途路上都有白米在地下, 我歡喜若狂, 用手撥埋一堆放入衫袋,
幾日後, 忽然有三個男人, 將我拳打腳踢, 呌我勿再來, 否則xxxx,
大家都明白喇!! 原來阻住佢哋偷白米呀!! 明天再續, 晚安,
*************************************************************
童年回憶, (七)
網誌日期：2008-06-11 21:34
日本藉口在"蘆溝橋"失去日兵,
就派出軍隊攻打中國, 侵佔東三省,
第二次大戰, 就此爆發八年抗戰,
昨日因為地下白米, 已經受到皮肉之苦, 三角碼頭已無立足之地,
二哥帶我去山頂, 找尋一些木料枯樹, 可以出賣換糧食, 每日都要
想法子找生活, 母親揾到一份工作, 在日本商人家庭工作,一家三口,
係要煮飯,洗衣,揍嬰兒,所謂一腳踢, 女主人係華人, 比較容易相處,
後來還許可母親, 帶著細佬開工, 重可以包食包住, 總算母子安定了,
我同二哥要搬家, 因為在四方街住所, 上落樓梯木板被拆掉, 便搬去
灣仔軒尼斯道, 接近母親做"住家工"地方, 是(廣生行)對面, 要回想
居住上環四方街時候, 斜對面二樓一家人, 係三母子居住, 母親係替
婦人梳頭謀生, 俗稱係(梳頭婆), 她忽然改變生活, "穿金戴銀"朝魚
晚肉, 後來街坊傳言, 她兩兒子有(鎗)傍身, 四處去"打家劫舍", 就算
係婦孺皆(殺), 經過 幾個月之後, 兄弟兩人在三更半夜, 哭哭啼啼聲,
大呌唔好打我, 唔好殺我呀!! 最後兄弟互相撕殺, 弟跳樓死, 兄吞鎗亡,
街坊紛紛傳聞, 被枉死鬼上身, "報仇雪恨", 信不信由你!!! 明日再續, 晚安,
********************************************************************************
童年回憶,(八)
網誌日期：2008-06-12 22:11
我相信行善可積福,
盜賊搶劫有報應!!
有兩兄弟, 只有幾個月光彩,
就相繼死亡, 可憐母親依靠誰??
好兄弟我的二哥, 時刻關懷我, 每天出門前, 吩咐留意"警報",
(盟軍)日日轟炸, 平民為走"警報"狂奔亂跑, 都希望死裡求生,
鵝頸橋電車廠對面, 南洋香煙公司, 被炸中起火, 當時我躲在,
只隔一條水坑的羅素街, 真係唔死都嚇病, 好多人趁亂偷又搶,
我跟著其他人, 走進電車廠寫字樓, 我看見有一壺熱飯, 馬上
取去, 我恐怕被人捉著, 因為我未做遇賊, 心慌慌狂跑回家,不敢
即時食用, 只有飲啖水, 抖順條氣定定神, 可以食飯喇!! 二哥尚未
回家, 我好驚怕, 第二日都唔敢落街, 我將事實告訴二哥, 他安慰
說 :亂世戰爭時期, 偷竊強搶隨時發生, 算是無奈喇!!
明日再續, 晚安,
****************************************************************
童年回憶,(九)
網誌日期：2008-06-14 14:50
早上起來, 二哥帶著我去灣仔道, "國泰戲院"橫門, 許多人在等待做苦工,
到咗七點鐘, 有工頭開始登記人名, 用大卡車送去北角"筆架山", 斬松樹,
掘戰壕, 由朝到晚冇伙食, 要自己帶備糧食清水, 每日有兩蚊軍票, 白米
半斤, 有日軍監管各人的工作, 下午六點鐘收工, 好辛苦, 做咗十幾日咋,
二哥揾倒一份新工作, 在中環"香港大酒店"做侍應生, 這裡係日本仔的
"銷金窩", 地址係現在"置地廣場, 二哥的新職業, 有薪金有飯食, 總算得
安定了, 每日我在街上閒逛, 行到大坑道口"聖保祿醫院", 便跟隨別人
入內, 等候病人食剩的菜飯, 工人收回洗碗房, 我便窺見無人, 馬上取去
"菜飯", 躲在門後面, 急急狼舌虎嚥, 經過幾日後, 慘喇!! 兩名修女發現,
大聲呼叫, 其他人都知道, 立即通知日兵到來, 指定我係(賊), 將我綑綁,
要拉我去殺頭, 我大喊求情又跪又拜, 都無助喇!! 明日再續, 晚安,
**************************************************************************
淪陷時期,童年回憶,(十)
網誌日期：2008-06-15 21:48
骨肉之情深似海,
生離死別極悲哀!!
我從來沒有深夜不回家, 母親 二哥非常憂慮, 在街上四處尋找, 不知道
我已經被日兵扣留, 囚禁在一間石屋內, 係東院道近"東華東院"附近,
在石屋內飢餓哭泣, 絕望問蒼天, 怨枉處死不冥目, 太累身體虛弱睡著,
天亮了, 不知何時, 有兩人在我身後, 用腳踢我兩吓, 我醒來立即跪下,
原來一位是華人, 問我點解要做(賊), 而家拉你去殺頭, 我便叩頭訴苦,
細說原因, 父親已餓死, 兄長在"太古船塢"做工, 已經炸死, 無人照顧我,
跟著別人到醫院, 希望取些病人食剩"菜飯"充飢, 華人翻譯給日兵知道,
我不明白他們說什麼? 後來華人給我三件咸豆腐, 華人說而家放你走,
我知道後, 喜極哭泣, 全身發震, 即刻向二人三躹躬, 說出 :(亞里亞鐸),
(千助,千助), 係兩句日語, 聽得多學人講啫!! 明天再續, 晚安,
*********************************************************************
童年回憶,(十一)
網誌日期：2008-06-16 21:50
慈母念兒夜不歸,
兄長難得手足情!!
經過一夜的囚禁, 日兵釋放我, 慢慢行去電車路, 太陽出來時, 我感覺
頭暈眼花, 在行人路, 靠著牆壁坐下, 不敢移動, 忽然有男子扶起我,
哦!! 原來係 "鄭 海"叔叔, 他是我兩兄長的朋友, 亦是一同做苦工的,
"鄭 海"叔叔問我是否有病, 我搖頭說不是, 又問現在搬到那裡居住,
我說係廣生行對面, 德昌當舗四樓, 他趕路去"太古船塢"做配給白米,
我返到去天樂里, 在遠處二哥已經看見我, 馬上走過來, 拖著手回家,
將昨日發生事情, 細說一切遭遇, 二哥嘆息無能力照顧我, 晚間母親
放工回來, 二哥安慰母親說 :弟弟回家喇, 會把事情慢慢告訴妳, 大家
應該休息吧!! 在一個晚上, "鄭 海"叔叔到訪, 跟二哥細談近況, 知悉
我找不到生活, 叔叔建議帶我去"配白米", 說明沒有危險, 想知詳情,
兄長恐怕我再被捕, 半信半疑, 要求詳細解釋, 明天再續, 晚 安,
********************************************************************
童年回憶,(十二)
網誌日期：2008-06-17 21:24
落毒無人見, 良心有天知!!
兄長二哥同"鄭 海"叔叔的談話, 我在旁小心聽著, 原來係領取白米,
"太古船塢"招請勞工, 逢星期五出糧, 逢星期一配給白米, 發工資用
信封"糧袋", 每天五蚊軍票白米一斤, "糧袋"印有白米重量, 多勞多得,
所以"糧袋"白米重量不一, 有人專門收購"糧袋", 利用小童揸著"糧袋",
入去"船塢"領取白米, 首先由配給站工人, 集合幾名小童給他們認識,
然後安排去"船塢"配給站, 一個布袋一個"糧袋", 傳遞配給白米工人,
重有(暗號)雙手握拳, 配給站工人醒目, "糧袋"是四斤白米, 就俾七斤,
三斤就俾六斤, 如此類推, 要放入藤唿內, 用手出力抽著行, 不淮用
膊頭托著走, 如果被發現有可疑, 無論如何, 又打又嚇, 都說不知道,
唉!! 咁冒險的工作, 真係好難捱, 唯有做一日慌一日喇!! 明天繼續,
晚 安,
****************************************************************
童年回憶,(十三)
網誌日期：2008-06-18 21:48
關於昨日講到冒險騙取白米, 為了微薄的報酬, 任人擺佈犯罪,
幕後人要我, 每次領取白米後, 馬上化妝換衣服, 再去第二次,
一個上午要去四至五次, 由配給站經"東閘", 行去太沽街交回
白米, 下午停止領取白米, 因為每天午飯後, 日軍經常會巡邏,
每日早上七點開始, 行路去西灣河, 八點到達太沽街, 有一碗
白粥充飢, 就要準備工作喇!! 待遇有午餐, 工資五蚊軍票, 忙記
經過多少日子, 最終幕後人知道, 我被便衣日軍根踪, 暫停工作,
我要生活, 家中有方型玻璃瓶, 可以用來賣"薑汁糖", 春園街有
"薑汁糖"批發店, 五蚊軍票有120粒, 我賣一毫兩粒, 如果賣晒,
可以赚得一蚊, 有時能夠賣240粒, 好開心自己做老板, 邊度人多
就去賣, 最好係...(鵝頸街市),(軒尼斯道),(鐸也)=海軍船塢,(海皮)
=干諾道中, (三角碼頭),(修頓球場), 沿途呌賣 "薑汁糖"一毫兩粒,
(大蕃薯)做老細喇!!!! 哈!! 哈!! 明天再續, 晚安,
***************************************************************************
童年回憶,(十四)
網誌日期：2008-06-19 21:28
創業容易, 守業難,
我希望自食其力, 原來事非經過不知難, "薑汁糖"沒有包裝, 天氣潮濕,
或買者用手取"薑汁糖"時, 手有汗水好易溶化, 減價一毫三粒都無人買,
令我血本無歸, 奈何要結束(老板)夢, 回復到處流浪生涯, 許多居民要
逃避戰火, 離開居所回鄉躲避, 到處都有空屋冇人住, 如果看見大門打開,
就是已經被搶奪了, 這時候我才夠胆入內, 執些可以換錢的, 有木板,銅,
電線,銻煲, 攞去收買鋪都會要,
街上日日有飛機派傳單, 宣佈好快就(和平), 誰知一日比一日艱難,
(盟軍)飛機天天轟炸, 糧食非常短缺, 有錢都冇白米買, 到處有人搶食物,
隨處都有飢餓死屍, 早上仵工忙碌收殮, 好慘!! 明天再續, 晚安,
*********************************************************************
童年回憶,(十五)
網誌日期：2008-06-20 21:41
臉相從心轉,
八字定終生,
皮黃骨瘦誰憐憫, 餓死路邊仵工執, 等死不如用命肉搏, 無氣力做苦工,
灣仔春園街, 中環威靈頓街, 都是我搶食物的地方, 對唔住 D 街坊,
我每次搶食物, 都會等待對方食咗一半, 才動手搶食物, 我不會逃跑,
馬上放入口裡狂吞, 企定任打, 拳拳如雨下, 肉痛易忍, 飢餓腳軟難捱,
過咗幾日後, 已經被街坊認出, 我再無法立足, 回到家中, 看見"鄭 海"叔叔,
跟二哥閒談近況, 提議我由"鄭 海"嬸嬸, 一同做(水客), 帶衣服貨物去"惠州",
我立即答應下來, 大熱天氣, 身穿五套衣服, 一個載滿葯物及日用品包袱,
晨早開始行程, 第一日行到(大埔墟), 第二日到(橫崗墟), 第三日到(龍崗墟),
第四日行到(惠州市), 沿途在各墟場呌賣, 有一次在路上, 被日軍守身檢查,
我戴著一頂竹帽, 忘記除下敬禮, 被日軍用鎗口刺刀, 挑起頂帽跌落水坑,
後來它表示可以放行, 我跪地示意, 指吓個(天), 指吓個(頭), 指吓水坑頂帽,
然後執番頂帽, 日軍冇阻止我, 行到路邊一間茶棚, 有杯水飲喇,"嬸嬸"行來,
取去我的帽, 我望吓佢, 原來有五佰港紙在內, 嘩!!! 好危險呀!! 檢查出來,
我個人頭就要落地喇!! "鄭 海"嬸嬸, 妳想我死呀!! 明天再續, 晚 安,
次在路上, 被日軍守身檢查,
我戴著一頂竹帽, 忘記除下敬禮, 被日軍用鎗口刺刀, 挑起頂帽跌落水坑,
後來它表示可以放行, 我跪地示意, 指吓個(天), 指吓個(頭), 指吓水坑頂帽,
然後執番頂帽, 日軍冇阻止我, 行到路邊一間茶棚, 有杯水飲喇,"嬸嬸"行來,
取去我的帽, 我望吓佢, 原來有五佰港紙在內, 嘩!!! 好危險呀!! 檢查出來,
我個人頭就要落地喇!! "鄭 海"嬸嬸, 妳想我死呀!! 明天再續, 晚 安,
***************************************************************************
童年回憶,(十六)
網誌日期：2008-06-21 18:46
屋漏兼逢連夜雨,
行船遇到頂頭風,
命運是否支配人生, "鄭 海"嬸嬸秘密收藏(港紙)在竹帽內,
我朦查查就載著頂帽, 若無其事去"惠州", 遇到日軍檢查,
沒有被檢查出來, 當年任何人存有(港紙), 就立即殺頭,
經過一星期的(水客)生涯, 好似死過翻生, 回家向二哥投訴,
決定不再做(水客)喇!! 真係禍不單行, 母親 二哥同時失業,
傳說日軍開始徹退, 已經取消"糧票", 冇白米配給, 母親跟
二哥考慮之後, 希望我同弟弟逃生, 再要求"鄭 海"嬸嬸帶
我倆兄弟去"惠州", 送給別人做(養子), 希望有人家收養,
點知道"嬸嬸"話 : 暫時來往公路好緊張, 不能冒險前往,
祗好在家中等待餓死, 一日行到"大三元"門口,有一男子
問我, 幫手拉木頭車, 人工係三蚊一日, 明早八點鐘開工,
在上環"銀龍酒家"門口集合, 明天再續, 晚 安,
**********************************************************
童年回憶,(十七)
網誌日期：2008-06-23 17:52
嚴父棒下顯孝子,
慈母忍淚別倆兒,
僥倖有"老闆"聘請, 每日 8 點至 6 點, 工作係拉(交通工具)"木頭車",
要一路拉, 沿途大聲[嗌], 來往上 ,中環, 大佛口, 灣仔, 天樂里, 跑馬地,
好辛苦拉足 10 個鐘, 就有三蚊出糧, 餓咗一日, 可以買食物醫吓肚喇!!
點知"老闆"話 : 賭錢[輸晒]無錢出糧, 明早開工才有錢, 我當然死纏
追討, 去到舊"第一樓"門口, 佢開始大聲夾惡, 將我拳打腳踢, 真慘!!
我放聲大哭, 大呌救命!! 有一位男子走近我們身旁, 大聲喝道 : 你們
(發生乜事), 我搶著回答 : 今天的悲慘遭遇, 這位男子聽完我的投訴,
立即向"老闆"臉孔掌拍幾下, (當時該名男子看見一切的), 佢要"老闆"
馬上給我五蚊, 有兩蚊係(肉體痛楚)賠償, 男子問我幾多歲, 我話12歲,
男子就呌我跟著佢走, 帶我去"金龍酒家"後面, 鴨蛋街"大牌檔",呌聲
"肥佬榮"俾一碗腊味飯, 係呢個"細路"食嘅, 要靚 D 呀, 該男子吩咐
我, 唔使俾錢喇, 食飽飯就返屋企, 你唔使怕佢架, 再有事我會搵佢,
好心人走咗喇, 我細細聲話 : 佢咁惡嘅, 唔通係"堂口大佬", 一搭檯
阿叔話 : 佢係..."陀鐵密偵"呀!! 同日本仔做(翻譯,查案),原來遇到一
(貴人), 救我一命, 否則唔打死都重傷, 感謝!!
母親, 二哥在家中, 等待我回來, 都未曾說話, 便攬實我和弟弟痛哭,
原來已經決定送兩兄弟去(惠州), 希望其他人家收養, 可逃生免餓死,
我整夜難眠望天亮, 起身洗臉後, 跪地叩別...母親, 二哥, 保重身體!!
我聲明, 唔想在路上被日軍(斬頭), 袛穿兩套衫,一條毛巾,一對布鞋,
就帶住弟弟"華仔"一齊上路, 不知是(禍), 或是(福), 明天再續,
**********************************************************************
童年回憶,(十八)
網誌日期：2008-06-26 13:19
風雨過後現曙光,
路途遙遠苦亦行,
早上母親煮好兩碗"稀粥", 要我同弟弟食用, "鄭 海"嬸嬸已到來,
母親對嬸嬸說明我的要求, 今次去(惠州)是不回來的, 唔想做(水客),
袛希望嬸嬸帶著"倆兒"逃生, 沿途有啖"粥水"充饑便是, "鄭 海"嬸嬸
知悉之後, 就要提出條件, 無論去到那裡, 只要有人家收養, 不論是
"富貴家庭" 或是 "山區貧戶", 各安天命, 與人無由, 所得賣身酬金,
不得過問, 全數屬於"鄭 海"嬸嬸所有, 要立字為據, 以免日後追究,
母親答應一切, 二哥有點要求, 希望 嬸嬸將倆弟弟的住址, 帶回來,
如果有朝一日, 能夠儲蓄金錢, 可以將倆弟弟贖回, 嬸嬸答應要求,
我同弟弟強忍淚水, 略略發出一些"微笑", 避免再令母親 二哥難過,
就此跟著(水客)嬸嬸離去, 不敢再回頭望,
經過兩夜三日的行程, 到咗(龍崗)鎮, 找到旅店住宿, 遇有相熟店舖,
(水客)嬸嬸就馬上放消息, 說明有香港小童出賣, 墟場人來人往, 經
常有男女在旅店門口, 喞喞細語眼望望, 他們跟我談話, 我一句也
聽不明白, 有一男子講(白話)的, 說 : 他們係(客家人), 嬸嬸回來,
看見有幾個人跟我談話, 立即制止, 帶我倆返樓上, 警告以後不准,
同別人講出自己身世, 任何事情由她作主, 可能有問題, 明天再續,
******************************************************************
童年回憶,(十九)
網誌日期：2008-07-04 17:48
老人小病見醫生,
選擇飲食應留神,
最近天氣變幻無常, 不慎飲食欠妥, 就是老毛病...(感冒,兼全身骨痛),
經過醫生診治, 準時服藥, 多飲水, 多休息, 與病魔搏鬥數天, 痊癒喇!!
現在繼續我(童年)的旅途, 在"龍崗鎮"旅店住咗兩天, (水客)嬸嬸已經
找到, 願意領養我們倆人, 可惜不是同一家庭, 弟弟"華仔"被收養成為
兒子, 我就被另外一個家庭, 領養成為(牧童), 即係"看牛仔,童工",
因為要簽訂"賣身契", 有人懷疑我倆同(姓氏), 是否親生兄弟, 就唔想
領養, 恐怕日後會一齊偷走(走佬), 好彩 嬸嬸預先有所訓導, 警告切記
我的父親係 (X松光), 弟弟"華仔"父親係 (X 祺), 我的是假父名, 弟弟
是用父親真姓名, 容易記,不會錯, "鄭 海"嬸嬸多次警告恐嚇, 說:如果
這回轉賣唔成功, 就會將我倆帶上山頭, 放棄在樹林裡, 任憑自生自滅,
皇天保佑, 成功被兩家庭收養, 看見 嬸嬸收取大叠貨幣, 沒有半句話,
轉身便離去, 從此以後, 兄弟同一條村生活, 互不相認, 更不敢交談,
這樣活下去, 我感覺非常痛苦難受, 明天再續,
******************************************************************
童年回憶,(二十)
網誌日期：2008-07-07 13:40
七,七,
蘆溝橋事變,
日本侵華就開始,
一九三七年七月七日, 我係一名五歲小童, 就飽受亂世的痛苦,
現在繼續 [童年回憶], 那位(水客)嬸嬸, 將大叠貨幣放入布袋裡,
便急速離去, 我想跟她說一.兩句話, 希望她返香港, 對我母兄有
句交代, 1)賣給那户人家, 地址係何處, 2)可否將"賣身錢"俾 D
我倆母兄養命, 令我完全失望, 我母親.兄長之恩情, 何時報呢??
弟弟"華仔"的家庭, 生活好, 受愛護, 有讀書, 改名換姓(X桂倫),
我就好大分別喇, 六點鐘起床, 擔水,煲茶,煮半镬白粥,早餐做好,
食完早餐, 各人出去田地耕作, 一位嫂嫂給我, 一把鐮刀,兩條繩,
一條長竹, 跟著她去上山割草, 下午各人耕作回來, 我要牽牛去
山崗吃草, 關於午飯,晚飯, 我負責燒草, 飯後洗碗筷, 清潔豬舍,
工作一天太累喇, 要沖涼瞓囉, 冇床一件木板舖地下, 成晚被蚊
咬醒, 唉!! 以後的日子唔知點捱, (客家話)我唔懂, 只靠睇手勢,
日漸明白些少, 可惜每日飯餐前, 首先要食一大碗蕃薯, 然後才
可以食飯, 所以我永遠記住, 係靠食蕃薯活命的, 我係[大蕃薯],
經過四年艱苦歲月, 我要慢慢回憶喇!! 明天再續,
(1944---1948)被收養的,
*******************************************************
童年回憶,(二十一)
網誌日期：2008-07-09 16:52
順得哥情失嫂意,
童年哀傷聁眾知!!!
網誌 Blog 友們, 首先感謝大家支持, 令我勇敢寫下去,
將六十多年前, 我憶屈在心內的苦難, 在此賣弄文章,
自覺慚愧, 但是回顧(二十)篇, 亦有"粉絲"捧場, 感慰藉,
現在繼續[童年回憶], 在(客家)圍村生活, 轉眼有數月喇,
每晚睡覺前, 總是想念親人難眠, 弟弟"華仔"相隔不遠,
可惜無暇前去偷看, 他上學放學不經過我門口, 太掛念
他的身體近況, 要偷閒故意在他門口走過, 希望看一眼,
果然不負所望, 不是"皮包骨", 他亦看見我, 祗無言相對,
見臉後的心情, 好似放下心頭大石, 不必再牽掛, 秋天來臨,
晚上有些涼意, 沒有被褥保暖, 祗好去厨房瞓草堆, (客家話)
有時唔明白, 就被駡...係大蕃薯, 原來解說係"愚蠢"材料,
慢慢學聽學講, 早餐呌(食朝), 聽錯係食蕉, 撓水用呌(売麻),
牽牛繩呌(索麻), 因為"売"."索"好似同音, 經常搗錯, 被駡!!
偶然聽講...日本仔已經投降, 香港恢復太平盛世, 有港人回鄉
通報喜訊, <東華醫院兩餐派飯>, <大量請人掃街>, 我歡天
喜地, 滿以為可以逃生(走佬), 想到"華仔"點算呢??? 唉!!
明天再續,
*************************************************************
童年回憶,(二十二)
網誌日期：2008-07-12 17:12
寒來暑往又一年,
冬冷夏熱捱三載!!
一九四五年, 中秋節過後, 鄉間到處傳聞, 日本投降"扯白旗",
許多回鄉避難的, 紛紛預備返回香港, 想到我的身世, 要逃走
卻比"登天"更難, 因為那家庭手上, 有我的"賣身契", 一生一
世都是(任勞任怨), 直到死亡, 週圍都是農地, 如果逃離耕地
範圍以外, 即刻有人追捕, 曾經有(牧童,看牛仔), 想偷偷(走佬),
被村民捉回來, 將他打到跛腳, 這是殺雞儆猴, 看誰還敢偷走,
我本來有(走佬)念頭, 我不怕死, 只怕成功逃到香港後, 1)找尋
不到 母親,兄長, 2)留下弟弟"華仔"怎麼辦, 他祗有 8 歲太細,
思前想後, 決定放棄逃走, 繼續留下捱苦, 冬天刀風箭雨(捱冷),
夏季蚊釘蟲咬(難眠), 一年前, 主人的兒子 19 歲, 為要抗日意願
參軍, 加入"東江游擊隊", 和平後(國共)內戰, 在惠州"羅浮山",
壯烈陣亡, 主人受到, 痛失兒子哀傷, 他本來有兩名兒子, 三年
之前, 大兒子病逝, 現在主人, 有意將我改為他的(養仔),
明天繼續,
**************************************************************
童年回憶,(二十三)
網誌日期：2008-07-14 14:52
希望風雨成過去,
太陽從此升起來!!
世事難如意, 本來想等候機會, 帶同"華仔"一齊逃跑(走佬),
主人忽然宣佈, 決定改變我的身份, 由一名(看牛仔),改變為
他的(養仔), 我無權利反對, 一生一世已賣身, 捱苦一年多喇,
相信不會有好待遇, 果然跟以往一樣, 用勞力換兩餐食, 不過
要請村中"父老"作見證, 一塊紅布寫下"收養"詳情, 到祠堂
品神兼拜祭, 燒炮仗, 舞麒麟, 請村民食飯飲酒, 經過儀式之後,
我就工作照舊, 每日到耕地學種田, 有教師前來建議給我上學,
"養父"聽說要收取一担禾谷, 作為一年學費, 拒絕答應 (嫌貴),
因為抵受日日辛勞, 身體非常虛弱, 感染瘧疾(發冷病), 每日中
午準時病發, 全身打冷震難受, 冇醫生, 冇葯食, 祗有晒太陽,
如果冇陽光, 為有捐入禾草堆取暖, 要忍耐兩至三小時, 然後身
體慢慢回暖, 開始頭暈出汗, 全身無力, 悽涼無可奈何, 鄰居有
一位好心人"球嫂", 每日看見我如此辛苦, 就願意伸出援手, 用
幾粒"蒜頭" 加 "山草藥", 切碎啄爛之後, 在發病前一小時, 將
兩隻手腕, 用草藥同布條縛實, 經過三日治理, 果然見效, 好感謝!!!
明天再續
****************************************************************
童年回憶,(二十四)
網誌日期：2008-07-16 16:23
往事已去似雲煙,
將來如何未可見!!
日日難捱年年過, 轉眼已有兩年多, 事非經過不知難,
[農民]的耕作生活, 真係太勞苦喇, 不論是晴天雨天,
晴天在田野工作, 雨天在家磨穀撞白米, 有時要擔白
米去墟場售賣, 我16歲要擔50斤, 約一小時行一里路,
接近歲晚新年前四十天, "養父"要我養大40隻肥鵝,
才有一套衣服過新年, 春節之後, 要斬蔗窄片糖, 用
三隻牛成為一組, 拉動一座兩個大石輪, 將竹蔗窄出
蔗汁, 用兩隻大鑊, 輪流煮成糖漿, 倒入草蓆上面推平,
等候涼凍之後, 切成長方條便完成, 半夜三更, 我負責
趕牛走動, 天氣寒冷, 刀風刺骨, 衣服單薄, 冷凍六小時,
要用草繩縛著條腰, 咬薑取汁吞食保暖, 明天再續
****************************************************
童年回憶,(二十五)
網誌日期：2008-07-20 09:52
風高浪急無須懼,
咬緊牙關抗逆流!!
光陰三載已逝去, 1948年已是和平後, 我16歲喇, 思念
母親,二哥在心裡, "鄭 海"嬸嬸必定沒有帶回口信, 令
母,兄無法前來贖回我倆, 唉!! "養父"性情兇惡, 嗜好
赌慱, 飲酒, 每逢...輸錢,酒醉回來, 我就無法避免痛打,
有時隨手拿起掃把, (洗猪舍用)的, 不論身體何處亂打,
有時半夜三更回來, 用雙腳將我踢醒, 踩頭,踢腰肚, 我
不敢大聲痛哭, 如果將家人嘈醒, 我會再次被痛打一身,
這樣的日子我捱慣喇, 弟弟"華仔"已11歲, 開始懂事喇,
我想究竟要忍受下去, 還是要冒險逃跑(走路), 經過思考,
決定用死亡換取生路, 一定要帶"華仔"逃亡, 望天打救,
明天再續,
*******************************************************
童年回憶,(二十六)
網誌日期：2008-07-23 16:09
希望風雨隨水流,
太陽從此昇起來!!
1945年夏季來, 1948年冬季去, 就是我在(客家)的悲痛日子,
夢想逃跑的機會來喇, 鄰居一位好心人"球嫂", 亦是香港
水客帶來, 五年前被賣做農民"妻子", 我曾對她說想逃走,
她同情我渡日如年的慘痛, 便冒險獻計幫助我, 首先要同
弟弟"華仔"暗中相量, 如何逃出生天, 寒假開始"華仔"放
假, "養父"離家去趁墟買貨, 家人全部去田耕作, 我做午飯,
要準備擔"茶飯"出田邊, 大家一齊食用, 回家時, "球嫂"說
現在教你們怎樣逃跑, "華仔"在我家中等你, 你先行一步,
去對面山崗"蔗田"躲藏, 隨後我會帶"華仔"跟你會合, 記著
要慢慢行, 過了一會, "球嫂"帶住弟弟, 從另外一條小路走
來, 恐怕有人跟蹤追捕, 成身震驚害怕, "球嫂"給我倆五蚊,
吩咐我倆在"蔗田"休息, 等待深夜村裡燈火熄滅, 向山上跑,
不要行近農村, 我認識去"橫崗鎮"的路, 摸黑行咗幾個山坡,
接近天亮喇, 不敢再向前行, 在一條小河草叢邊休息, "華仔"
對我說 : 阿哥我肚餓又口渴呀, 等到天光大白, 買個飽俾你,
明天再續,
*******************************************************
童年回憶,(二十七)
網誌日期：2008-07-27 18:13
蜜糖是蜂兒去採,
崎嶇山路我來行!!
天亮了!! 弟弟"華仔"說: 肚餓又口渴, 我亦有同感, 無奈
已經迷失方向, 不知道身在何處, 是否脫離危險境界, 我
祗好呌"細佬"躲藏起來, 自己冒險行出大路, 看見有一商
店, 我站在門口, 不敢說要買飽點, 店內婦人望我一眼, 我
心跳加速, 想立即逃跑, 又怕更受懷疑, 我冷靜地指住飽點,
該婦人問我"哀墨雞", (客語)要乜嘢, 我口震震話要買兩
個飽, 婦人睇出我不是圍村人, 對我微微笑話, 你係邊度來,
我係好人不要怕, (她開始講白話), 我又喜又驚慌, 阿姑求
求妳不要帶我回去, 如果返去我就冇命喇, 佢呌我進入內,
慢慢將事實告訴她, 我對她說 : 還有一弟弟在水坑草叢裡,
她知道後, 俾一頂帽一隻籮仔, 呌我去作狀採摘, 帶細佬來,
不久我倆順利回到商店裡, 有餅乾食, 有茶飲, 經過一夜不
眠不休, 我倆太累喇, 該位婦人看見, 我倆出現疲倦不堪, 她
帶我倆上樓閣, 在這裡休息睡眠, 晚上帶你們去見一家人,
他們是趕牛群出香港賣的, 不要怕係我親戚, 她是誠意幫助,
我倆感謝她的好意, 但是另一家人怎樣? 聽天由命, 生死未卜,
明天再續,
*********************************************************
童年回憶,(二十八)
網誌日期：2008-07-29 21:29
雖有流水阻去路,
崎嶇山路連夜慌!!
起身呀! 起身喇! 小商店阿姑呌醒我倆, 現在我要
帶你們去見一家人, 太陽下山行到天黑, 前面有
十幾隻牛群, 小村莊有一男子坐在門口, 阿姑對
我倆說: 這位係"趙叔叔"說聲好喇, 趙叔叔你好,
阿姑說: 呢兩個細路未食飯, "趙叔叔"呌別人給
我倆飯菜, 食飽飯坐在地下, 等到半夜時候, 一名
男子問我倆是否去香港, 我倆點點頭說係, 現在
跟我過來, 牽兩隻牛一前一後, "華仔"牽一隻黃牛,
要跟隨牛群走, 過山越嶺, 經過一個山坡, 是墳場
墓地, 我曾跌落一個空墓穴, 慌忙趴起身, 呌細佬
小心空穴跌倒, 走過兩條淺水河流, 天色已微亮,
看到有樓宇,未知還要走幾遠, 帶隊吩咐停下休息,
明天再續,
**************************************************
淪陷時期,童年回憶,(二十九)
網誌日期：2008-08-01 13:33
八方世人憐憫我,
四海同胞善心人!!
早上休息片刻之後, 帶領男子通知各人, 繼續牽牛群前行,
去到公路旁樹林停下, 不久有一輛大貨車, 慢慢駛來停止,
帆布帳篷寫著"上水廖壽", 我知道已經到達香港, 告訴
弟弟"華仔"我倆到咗香港喇, 司機叔叔見我倆係(童年),
即問帶領男子, 佢哋係邊個? 去邊度? 另有兩名男子說,
阿細你負責送佢哋, 去深水埗碼頭過海, 已將牛群趕上車,
阿細安排"華仔"坐車頭, 教我站立在車尾, 先把兩條木桿,
橫閘住牛群, 車縫頂放下一條打結粗繩, 阿細哥哥吩咐我,
行車時不要慌張, 一手揸粗繩, 一手揸木桿, 站穩在木板上,
車行得很快, 有些頭暈眼花, 還想嘔吐, 大聲呌阿細哥哥,
我要落車呀, 他可能聽唔倒我呌, 繼續駕駛前往, 我祗好
閉上眼睛用力呼吸, 感覺左搖右擺, 過了一段時間, 車停
下來, 阿細哥哥對我說: 呢度係北河街, 一直行就係"碼頭",
我負責送到呢度, 你哋自己搭船過海喇, 你有冇錢呀,買D
食物食咗再行喇, 我點吓頭說: 唔該晒,多謝!!
我去惠州時, 都是在北河街開始, 所以略有印象, 見有一
間餅店, 就買麵包, 一蚊有十二個, 我倆食一個就唔想食,
因為口渴冇水飲, 搭船過去中環, 怕搵唔倒母.兄, 好恐慌呀,
明天再續,
******************************************************
淪陷時期,童年回憶,(三十)
網誌日期：2008-08-03 18:05
重見天日非容易,
萬水千山甚艱難!!
回憶1945年夏天, "鄭 海"嬸嬸帶著我和"華仔", 由灣仔家中
離開母親,二哥, 經過四日路程, 去到"龍崗鎮, 賣給農家收養,
捱過辛苦勞動, 受盡肉體痛楚, 1948年冬季, 有好心人幫助,
把握機會馬上逃跑(走路), 沿途都有貴人扶助, 順利返抵香港,
由香港淪陷至和平後, 感受七年的苦難, 現在向所有曾經救
助我倆的恩人, "三跪九叩"多講幾句感謝!!!!!!!!!!!!!
我帶著細佬返去灣仔, 找尋軒尼斯道舊居所, 可惜人去樓空,
我難忍眼淚流出來, "華仔"望著我亦大聲喊, 真係唔知點算好,
揸住幾個麵包, 袋裡只有四蚊, (搭船係跟大人入閘), 舉目無親,
唔知"鄭 海"嬸嬸居住何處, 想到母兄會去街市買餸, 撞吓機會,
始終都係失望, 已經傍晚喇, 我倆在修頓公廁小便, 見有水喉,
立即張開口狂飲, 太累喇, 祗好在修頓球場休息, 食兩個麵包,
就在看台睡眠, 明天再想辦法, 半夜陣陣寒風難入睡, 感受慘!!
明天再續,
*************************************************************
淪陷時期,童年回憶,(三十一)
網誌日期：2008-08-05 18:28
天堂路途何處去,
母親兄長手足情!!
回到香港第一晚, 修頓球場係我倆的家, 陣陣寒風無法睡,
唯有安坐待天光, 整夜沉思母兄何方尋, 祗有姑媽係親人,
自從父親逝世後, 親情冷漠很少有來往, 不妨過海去找她,
果然找到姑媽家, 姑丈看見我倆似乞兒, 姑媽話: 重走番嚟
做乜嘢, 你哋老母怕餓死, 甘願賣咗你兩兄弟, 拿錢來養活
自己, 姑媽同姑丈在和平後, 一直冇見到你老母, 可能改稼,
我聽她講完一番話, 即時忿怒起來, 情緒難控制, 指著她大
聲駡: 妳點知道當時情況, 我阿媽賣仔妳是否在場, 消息由
邊度聽來, 我搵倒"鄭海"嬸嬸(水客), 在妳臉前對質, 一切
就清楚事實真相, 我倆都唔認妳係親人, 細佬跟我走,
唉!! 天捱海角, 母兄何處尋, 由白加士街, 行去油麻地碼頭,
我倆都肚餓喇!! 食埋四個隔夜麵包, 坐在路邊, 望住大海,
想起父親曾經講過, 有一位結拜兄弟, 在上環"平香茶樓",
姓名..屈西文, 係茶樓股東, 我倆就搭船去中環, 行到永樂
街, 上環街市對面, 企在"平香茶樓"門口, 唔敢上樓搵人,
一個叔叔坐在櫃面, 問我倆是否搵人, 我倆想搵"屈西文",
叔叔話: 我帶你們上樓, 老細係樓上, 看見一位肥佬伯伯,
叔叔話: 你要搵呢個係喇, 我點點頭呌聲"屈伯伯", 我講
出父親名字, 我倆在鄉下出來, 找尋母兄不遇, 懇求"屈伯"
能夠幫助, "屈伯伯"聽到來意, 呌我倆食飽飯, 就帶我倆
去, "屈伯伯"知道我母兄住址, 我同細佬好開心, 佳音呀!!
明天再續,
*******************************************************
淪陷時期,童年回憶,(三十二)
網誌日期：2008-08-08 17:27
哀傷三載念慈親,
喜樂拜謝屈西文!!
經過食一餐飽飯後, 感覺精神奕奕, 好似生龍活虎, 等待
"屈世伯"帶領我倆兄弟, 找尋隔別三年的母親.二哥, 心
情喜悅緊張又驚慌, 恐怕很難認出我倆, 因為又黑又瘦,
赤腳行走, 衣衫襤褸, 臉露憂愁, 想起母親.二哥有印象,
兩位至親永遠在我腦海裡, "屈世伯"吩咐我倆跟著行,
我認識上環一些街道, 由"平香茶樓"行上荷里活道, 左
轉看見"文武廟", 再向前行到接近城隍街, 有間集文軒
樂器店, "屈世伯"話: 你等一等, 二嫂可能去替人燙衫,
我記得街坊呌阿媽係(二嫂), 等一會"屈世伯"在樓上落
嚟, 再帶我倆去結志街, "屈世伯"對我說: 你哋阿媽在
街邊替人燙衫, 可以搵倒兩餐食, 看見母親喇, 我倆企
在她臉前, "屈世伯"說: 二嫂妳兩個仔呀, 母親彎著腰
在燙衫, 好像聽不到, 我同細佬一齊呌聲"阿媽", 她抬
起頭望一望, 似乎不認識, 繼續燙衫, 我拖著細佬, 再呌
阿媽呢個係細佬"華仔"呀, 她開始認真睇淸楚, 佢真係
"華仔", 阿媽問"屈世伯", 大少你喺邊度搵佢兩返來的,
有幾個街坊圍觀, 有婦女問: 二姑妳牽腸掛肚, 現在好囉
明天再續,
*******************************************************
淪陷時期,童年回憶,(三十三)
網誌日期：2008-08-13 19:04
認識親人蒙受辱,
街坊良朋齊讚賞!!
一位臉容敦厚, 身材飽滿, 高矮均勻, 就係"屈西文",
父親生前有兩位結拜兄弟, 一位"許仲佳" ,一位係
"屈西文", 我在最無助時, 忽然想起父親, 曾經帶我
去飲茶, 介紹認識屈伯伯, 我腦海出現父親的影子,
本來祗想要求, 屈伯伯暫時收容我倆, 先有棲身之所,
再想辦法找尋母親.兄長, 原來二哥同屈伯伯有交往,
所以能夠盡快帶我倆見到母親, 許多街坊, 想知到我
倆怎逃走, 我唔願多講, 希望快 D 回家, 母親哭著繼
續燙衣服, 吩咐我倆在樓梯口坐下, 等候客人放工,
取回衣物就有錢, 今晚買一餐好餸食, 重要去買我倆
的衣服, 母親說: 二哥在"香港大酒店"做工, 住宿舍,
已經呌人通知佢, 如果唔係當夜班, 亞哥回來相見,
晚上回到家裡, 原來母親租住一床位, 今晚瞓邊度??
明天再續,
********************************************************
童年回憶,(三十四)
網誌日期：2008-08-19 16:17
奈何見媽沒有家,
只要團聚不再怕!!
嘩!嘩!! 阿媽有四年冇食過妳煮飯喇! 我倆好開心呀!
有..燒肉,燒鵝,炒菜,蕃茄蛋花湯, 我同細佬坐床上,
阿媽向"五姑"借張椅, 坐在床口, 我哋食飯枱都冇,
飯後沖涼換新衫, 我同細佬當堂醒晒, 二哥尚未回
來, 我倆很心急想見到兄長, 阿媽話: 大佬當夜班,
明早帶你們去搵佢, 係在威靈頓街 7號, 酒店宿舍,
今晚要安排我倆, 細佬跟阿媽瞓床, 我瞓騎樓地下,
阿媽要求"五姑"批准, 借出騎樓給我暫住, 盡快另
找床位給我倆住宿, "五姑"係包租人, 都好心答應,
早上阿媽帶我們去食猪紅粥, 揸住一張紙皮, 唔知
要嚟做乜嘢, 原來去搵人寫字, 寫 "二姑休息數天",
返回替人燙衣服位置, 將紙皮字牌, 掛在樓梯門口,
首先去歌賦街, 拜見"親叔父.嬸嬸", 已經到咗中午,
阿媽話: 二哥早上才睡覺, 見到二哥, 三人相擁痛哭!!
明天再續,
************************************************************
童年回憶,(三十五)
網誌日期：2008-08-28 10:42
花好月圓人共賞,
雪中送炭亦不難!!
回想"汶川" "都江堰 "北川"28/5大地震, 感同身受,
[大蕃薯]雖然曾經過苦難, 都能夠路路遇貴人, 比較
四川災民, 我感無悔, 現在一家團聚, 已經難能可貴,
母親說: 二哥要結婚喇, 剛好兩兄弟回來, 喜上加喜,
我不能投靠兄長生活, 建議自己出外謀生, 母親帶
我倆去求見"親叔父", 嘗試要求他幫助, "叔父"提
議母親先行帶我倆回鄉暫住, 生活費由"叔父"寄付,
理由有二,1)避免養父來香港追尋, 2)在鄉間生活再
讀書比較經濟, 母親.二哥商議後, 便答應回鄉居住,
可惜母親只是收取到一次滙款, 四個月後, 母親非常
焦急, 恐怕斷水絕糧, 身邊的錢有限, 帶著我倆返港喇!!
明天再續,
*********************************************************
童年回憶,(三十六)
網誌日期：2008-08-30 15:34
夏日荷花夠嬌艷,
冬天雪梅能奈寒!!
母親的決定我理解, 巧婦難為無米之炊, 飢餓苦難
都捱過, 明白今天之後, 明日怎樣渡過, 母親是對的,
就無需考慮返回香港, 馬上去探訪"親叔父", 希望
叔父體諒我們回來, 母親就開門見山, 說出心底話,
"親叔父"嘆一口氣, 沒有說話, 二哥細細聲對母親
說: 係嬸嬸制止叔父滙款呀! 知道家家有本難念的經,
我不怕會饑死, 可以找一份包食宿的工作, 希望母親
搵間小學, 俾細佬"華仔"繼續上學, 佢12歲咋, 我就
已經17歲喇, 搵工做會容易D, 母親仍然在結志街
燙衣服賺錢, 有一間什貨舖請送貨工人, 母親相熟的,
立即帶我去見工, 老闆係潮州人, 第一句就話好辛苦,
第二句就呌我托起一包麪粉, 可以請你喇, 明日返工,
有食有住人工三十蚊, 有冇問題, 我點點頭表示滿意,
好開心呀! 食住都解決咗喇! 想到"華仔"要讀書, 點呢??
明天再續,
沒有留言:
張貼留言